حب الطفولة

علينا جيه يوم الجمعه والحمدلله سعاد وجدتي مكانوش في البيت كانو راحو يقضو الاجازه في البلد لانهم متعودين لازم كل اجازه يسافرو يعني محدش جابلهم سيرة الجدع دا ولا يعرفو اصلا إنه في ناس جايه عندنا تطلب ايدي 
لبست فستان وردي طويل وحطيت كحل بس و روج وردي وسيبت شعري مفرود ودخلت عليهم وانا اصلا مش عارفه هما مين لحد دلوقتي !
دخلت احط الصينيه قدامهم لقيتهم كلهم بيبحلقو فيا حسيت جسمي اتنفض من نظراتهم والكوبايات كانو هيوقعو مني 
نطقت أمي بفخر دي بقى عروستكم بسمه إن كان فيه نصيب .
وبصتلي وقالتلي و دي حماتك ام أحمد و اللي جنبها دي عمته ودي خالته ودي مرات عمه .
أمي كانت بتسميلي كل الستات دول وانا كل تفكيري في مين هو أحمد دا !!! معقوله يكون هو ! طيب هو لحق يتقدم لابويا بالسرعه دي ! بدات امه تتكلم ونظرات الإعجاب ظاهره في عينيها بصراحه أحمد ابني خجول جدا وبيتكسف حتى يقعد يتكلم وسطينا دا احنا لحد الساعه دي جايين معاه واحنا لسه مش مصدقين أنه اتجرأ اصلا وشاف واحده واتكلم معاها كمان وضحكو كلهم وبعدها كملت عمته بس ليه حق يطلع من كسوفه البنت تستاهل الجرآه والصربعه اللي صربعهالنا دي !! دا حتى جدته اټوفت ولسه ما كملت الأربعين قولناله اصبر حتى بعد اربعين جدتك وهنخطبوهالك بس هو حلف علينا راسه والف سيف لازم نيجي نشوفك على الأقل ونتكلم عليكي بعدين نبقى نقرأ الفاتحه ونعمل كتب الكتاب براحتنا 
يا نهار اسود !! دا الراجل كان بيتكلم جد جاي وناوي يكمل فيها كمان اعمل ايه انا دلوقتي طيب ! أمي وافقت على طول وقالتلهم في وشي دا شئ يسعدنا ويشرفنا وأكيد مش هنلاقي احسن من ابنكم .
واول ما الجماعه طلعو روحت وقفت في وش أمي انتو ازاي توافقو عليه من غير ما تسألوني عن رأيي حتى هو انتو اللي هتتجوزوه ولا انا ! ردت أمي بسخريه واسألك ليه ما انا عارفه انك مش بتفكري غير في المحروس بتاعك وبعدين انتي ليكي عين تتكلمي وبتتشرطي كمان !!
قولتلها بحزن وما اتشرطش ليه معيوبه ولا فيه حاجه نقصاني وانا مش واخده بالي 
لا يا موكوسه !! بس كل الناس عارفه انك إتخطبتي 7 شهور والراجل فسخ خطوبته وسابك قوليلي مين بقى اللي هيرضى يبصلك بعد كده !
رديت باصرار ومين قالك اني عايزه حد يبصلي اصلا 
بس يا مقصوفة الرقبه كلمه زياده وهاقطع خبرك خلي الحكايه دي تعدي على خير احسن والله ما هيحصلك طيب انتي فاهمه ولا لا !
ما قولتش حاجه وفضلت ساكته اما نشوف الحكايه دي هترسي على ايه
قولت في نفسي شوفي عدى وقت كد ايه ومحمد ما ظهرش ولا عرفت اوصل لاي اخبار عنه حتى رقم سلوى ضاع مني !
في نفس اليوم بالليل قررت اصلي إستخاره .
إتوضيت وصليت وطلبت من ربنا إنه يوجهني .
عدى يومين على الحكايه دي وقومت ارتب البيت كالعاده لقيت الباب بيخبط بفتح لقيت بنتين واحده ييجي عندها 17 والتانيه 14 هو دا بيت بسمه !
اه يا اختي مين اللي عايزها !
احنا اخوات أحمد وهو مستنيكي في العربيه عايزين نطلع ننقي الشبكه والدبل عشان يوم الخميس ان شاء الله نلبسهملك و نكتب الكتاب . جاوبت انا ببلاهه خميس ايه ودبل ايه قولتولي انتو مين !
قولنالك احنا اخوات احمد وشاورولي عليه بصيت لقيته هو قاعد في العربيه ومستني !
يا نهار مش فايت دول مش بيهزرو !!!
ماماااااااا يا ماماااااااا !!!!!
ايه في ايييه صوتك عالي كده ليه ومين دول 
انا بإرتباك دول اخوات أحمد عايزيني اطلع معاهم نشتري الدبل والشبكه !!
أمي بطمع اهلا اهلا يا بنتي اتفضلو ادخلو البيت بيتكم !! وبصتلي بغيظ مالك متنحه مستنيه ايه !!!! روحي البسي على ما اعملهم حاجه يشربوها يلا !!!! روحي اطلعي معاهم وانا هكلم ابوكي واعرفه بالخبر .
قومت لبست وانا مش فاهمه اي حاجه !!
طلعنا على محل مجوهرات وانا كنت ھموت من الكسوف وهو كان أكتر مني وخصوصا إنه اخواته قاعدين وسطينا يبصو عليه شويه وعليا شويه ويضحكو في سرهم مش مصدقين اصلا إن اخوهم شاف واحده وحبها وهيتجوز كمان !!
روحت منقيه اول حاجه جات عيني عليها وخلاص المهم اني ارجع واخلص من الموقف ده رجعوني بيتنا وراحو وانا كنت لسه ما فوقتش من الصدمه !! خميس ايه دا اللي بيتكلمو عليه يا ماما

!
الخميس الجاي اللي بعد يومين دا ! ليه طيب دا انا حتى لسه ما اعرفش اسمه بالكامل !
أمي فرحانه إنه الموضوع بتاع محمد هيخلص لما تتجوزيه ابقى اتعرفي عليه براحتك يا اختي ! بنات آخر زمن ! وبعدين ايه فيها يعنى ما احنا اتجوزنا من غير تعارف ومع كده ادينا آخر حب وانسجام !
لا ما هو باين الإنسجام